A Nosa Bodega
A nosa bodega naceu dunha antiga idea que roldaba a varios veciños da zona que buscaban a maneira de poñer en valor e promocionar os xa coñecidos viños tintos de Rubiós.
Así, a finais do ano 2003, os primeiros socios sentaron as bases desta idea e fundaron Señorío de Rubiós, que actualmente xa posúe máis de 100 socios que traballan para situar o viño de Rubiós no lugar que sempre lle correspondeu, por tradición, por castes e pola calidade dos seus viños.
Señorío de Rubiós é unha bodega diferente dentro da Denominación de Orixe Rías Baixas xa que aposta pola elaboración con variedades tintas autóctonas sen por iso deixar de mimar a elaboración de viños brancos.
Que a bodega se atope localizada na Subzona do Condado do Tea marca fortemente a súa filosofía. E por iso, o noso principal obxectivo é recuperar e manter o valioso legado vitivinícola existente dende sempre nesta zona.
Por este motivo, xa dende o inicio se fixo unha clara aposta por variedades tintas autóctonas como sousón ou pedral e tamén polas brancas presentes dende sempre no Condado, tales como albariño, treixadura ou loureira branca. Porén, co paso dos anos, a bodega tampouco renuncia a novas elaboracións e novos viños entre os que destacan os espumosos e os rosados.
